ruumteverkwikt

Ruumte verkwikt

een dek en vier muren, ievallig is wind
die vriengt langst de ruuten, een kouw'lijk begin
mae wat ei-je te willen, wees bliee da je 'r bin
as je in een klein 'uusje gebore bin

mae nauwe is wèrm en den an'ouwer wint
ze wete nie beter en wat wou noe een kind ?
buten liefst weze, want 't is binnen mae min
ook as j' in zò'n 'uusje gebore zelf bin

want ruumte verkwikt en is ulder nè 't zin
die uut de klein 'uusjes gekrope bin
- aerrem an aerrem de Gortstraet in -
en ze krupe wè terug, mae tegen d'r zin
die in de klein 'uusjes gebore bin

eerda je 't weet een nieuw eirbeiersgezin
een dek en vier muren, een kouw'lijk begin
een kleinen d'r bie, alla, schik maer in
ze krupe 'r wè uut, want zò'n 'uus is mae min

en aol op je beurte aesem j' uut en weer in
beter een klein 'uusje toch, as glad gin
mae buten is 't beter en wacht 't gewin
die in de klein 'uusjes gebore bin

ze komme 'r vandaen, mae nooit mì d'r in
die uut de klein 'uusjes gekrope bin
ruumte verkwikt en zò èn ze d'r zin
die uut de klein 'uusjes gekrope bin

ze weune noe ruumer, mae wat is 't gewin
as je uut een klein 'uusje gekrope mae bin ?
in ulder gedachten nog leve ze 'r in
die uut de klein 'uusjes gekrope bin

ze kenne mekaore an een blik, an een zin
die uut de klein 'uusjes gekrope bin
j'ei mae te kikken, dan binde ze in
die uut de klein 'uusjes gekrope bin

ze dienke zògauw: 't is omdat ik 'et mae bin
want wat uut zò'n 'uusje komt da's mae min
en z' èn gin verweer en beruste d'r in
dat jen 'uus soms verandert mae nooit je begin
ja, ieval is èrger, maer ei ruumte wè zin
ajje uut een klein 'uusje gekrope bin ?

Meer werk van Jan Zwemer